ಕಂದ ಬಂದು ಅಂದ ತಂದ

ಕಂದ ಬಂದು ಮನೆಗೆ ಅಂದ ತಂದಾನೇ s s s
ಚೆಂದದಿಂದ ಪರಿಮಳವ ಸೂಸ್ಯಾನೇ s s s||ಪ||

ಅವನ ಪುಟ್ಟ ಎಸಳು ಕೈಗಳೆಷ್ಟು ಬೆಚ್ಚನೇ !
ಅವನ ಅಮಲ ಕಣ್ಣನೋಟವೆಷ್ಟು ಸ್ವಚ್ಛನೇ !
ಅವನ ಮನದ ಒಳಗೆ ಇರುವುದೆಷ್ಟು ಕಲ್ಪನೇ !
ಅವನ ನಗುವು ನಿದ್ದೆಯಲ್ಲಿ ಯಾರ್ಯಾರೊಡನೇ ||೧||

ಅವನ ನಗುವು ಮನೆಯ ತುಂಬ ದನಿಯಗೊಡುತಿದೇ
ಅವನ ಅಳುವು ಮನೆಯ ಜನರ ಮನವ ಮಿಡಿದಿದೇ
ಅವನ ನಗುವಿನಳುವಿನಲ್ಲಿ ಏನು ಮಹತಿದೇ
ಅವನೆ ಬಲ್ಲ ಅವನೆ ನಲ್ಲ ಇಂದು ಮುಂದಕೇ ||೨||

ಅವನ ತುಟಿಗಳಲ್ಲಿ ಹಾಲು ಜೇನು ಸುರಿದಿದೇ
ಅವನ ಕಾಲಬೆರಳು ಅದರ ಸವಿಯ ಸವಿದಿದೇ
ಅವನ ಪುಟ್ಟ ಕಾಲಿನೊದೆತ ಹಿಗ್ಗು ತಂದಿದೇ
ಅವನ ಕೈಯ ಹೊಡೆತಗಳಿಗೆ ಸಗ್ಗವೆಟುಕಿದೇ ||೩||

"ಅಂಬಾ ಅಂಬಾ" ಎಂದು ಕರೆವ ಕರುವಿನಂದದೀ
"ಅಮ್ಮಾ ಅಮ್ಮಾ" ಎಂದು ಕರೆವ ತೊದಲು ನಾದದೀ
ಕರೆದ ಕರುವಿನೆಡೆಗೆ ಬರುವ ಗೋವಿನಂದದೀ
ಕರೆದ ಕಂದನೆಡೆಗೆ ತಾಯಿ ಬರುವಳಂದದೀ ||೪||


ರಚನೆ : ಕೆ. ಸಿ. ಚಂದ್ರಶೇಖರ್